काजूची भाजी

आंब्यांप्रमाणेच सध्या काजुचेही दिवस आहेत. एरव्ही वर्षभर सुके काजू भाजून, खारवून, तिखट-मीट लावून खाण्यात तर मजा असतेच, परंतु ऐन मोसमात ओल्या काजुची उसळ किंवा भाजी खाल्ली नाही, तर जगण्याला काही अर्थ नाही! म्हणूनच तुमच्यासाठी ही ओल्या काजुची खास रेसिपी-

साहित्य - अर्धा किलो ओले सोललेले काजू, एक कांदा मध्यम आकाराचा, मध्यम आकाराचे दोन बटाटे, एक वाटी तेल, एक छोटा चमचा हळद, तीन चमचे मालवणी मसाला

वाटणासाठी साहित्य- दोन कांदे, अर्धी वाटी ओला खोवलेला नारळ, अर्धी वाटी सुक्या नारळाचा किस, अर्धा इंच आलं, सोललेल्या लसणाच्या पाच पाकळ्या, अर्धा चमचा बडिशेप, तीन-चार काळे मिरे, ती-चार लवंगा, दालचिनीचा छोटा तुकडा, एक दगडफूल, थोडी खसखस, तमालपत्राची एक-दोन पानं.

कृती - तीन कांदे उभे कापून ते तेलावर तांबुस रंगावर भाजून घ्या, नंतर ओलं आणि सुकं खोबरंही वेगवेगळं भाजून घ्या. सुकं खोबरं भाजताना त्यातच आलं-लसूण आणि वर म्हटलेला खडा मसाला टाका. नंतर हे सर्व भाजलेलं साहित्य मस्त बारीक वाटून घ्या. वाटण तयार झाल्यावर एका पसरट भांड्यात उरलेलं तेल टाकून ते कडकडीत तापल्यावर त्यात उरलेला एक कांदा बारीक चिरुन टाका. कांदा शिजल्यावर त्यात हळद-मसाला टाकून ते परतून घ्या. कडेने तेल सुटू लागल्यावर त्यात पाणी टाका. नंतर काजू आणि सोललेल्या बटाट्याचे मोठे तुकडे टाकून ढवळा. थोड्या वेळाने वर तर्री आल्यावर दीड मोठे चमचे वाटण टाका. चवीपुरतं मीठ टाका. नाहीतर काजुच्या भाजीऐवजी काजुचं कालवण व्हायचं. ही भाजी याच पद्धतीने कुकरमध्येही एका शिटीत करता येते.